"Fröhliche Weihnachte !"
Och von der Mamm, däm Papp un unserem klein Marieche. ävver wenn Du et jenau wesse wills, es et bei uns noch janit eruss, ob mer Hellije Ovend fiere künne oder ob mer nit die janze Weihnachtsaktivität noch en der letzte Sekund verläje mösse.
Dat es nämlich esu:
Unser Kreppche, dat es ene Mordsapparat un fies schwer noch dazu. Dat es jed es Johr dann ene janz leckere Brassel, bes mer dat Dingen von ungen us dem Keller bes op de dritte Etasch erop jeschlepp han. Un jestern hammer dä Salat dann jehatt. Mer wore met alle Mann erav in der Keller, wo mer die Krepp op enem Schränkche medden em Enjemahte stonn han. De Mamm moot en de ääpelskess erin un der Pappa op de Kolle eropklemme, damet se üverhaup an die Krepp eran kunnte. Isch moot unge ston blieve un "Hauruck" sare, damet se die Krepp schön jleichmässisch erunger brassele kunnte. ävver da es der Pappa op de Kolle en et Rötsche jekumme, un de Mamm hät plötzlich de Verantwortung für da janze Stall von Bethlehem met all de janze Lück, die Schofe, die ööss, dä Essel un och die hellije drei Künnije allein jehat. Dat wor zevill för die Mamm. Se fällt met däm janze Schlamassel öm, hing jitz quer en dr ääpelskess, hat dat janze Brett met dr Krepp scheef em Nacke hänge, un wor jewaltisch am schänge. Jedenfalls hatte merjanz schön püngele müsse, bes mer die Krepp, de Mamm, die janze Lück un dat Viehzeuch widder us dr ääpelskess erus hatte. Dat äng vum Leed: de Mamm hätt e paar Schramme jehatt, der Stall von Bethlehem wor op einer Sick baufällisch und der einzije Hirt, dä mer hatte, usjerechnet dä hat dr Kopp av. Mer han nu drei Zentner ääpel zweimol janz durchjewöhlt, äwer jefunge hammer nix. Un dann jing der Palaver loss.
Der Pappa säht:
En Krepp met enem Schuppe ohne ne Hirt, dat jing nit. Dat wär jaje de Tradizion. Un ene Hirt ohne Kopp beim Kresskindche, dat jing schon enz janit. Ne neue Hirt anschaffe, jing jetzt och nit, weil die janze Fijure us Jipps wöre un uralt, un sujett künnt mer hück nirjends mih krijje. Jetz sach mer ens, leev Tant Billa, wo mer zwei Daach vür Weihnachte, wemmer keine neue Hirt kritt, dann su ne Kopp krijje soll. Den kriste doch janit !
Hät die Mamm och jesaht.
Also säht uns Marieche: dann maache mer en Krepp met bloss Viehzeusch, ohne Hirt.
Do hättste ävver de Mamm ens hüüre solle: dat wöör tüpisch Jugend vun hück, kein Ahnung vun Ackerbau un Viehzucht. Diere ohne Hirt, dat jing üvverhaup nit, die jinge direkt türme; un en Krepp möht schon äch sinn, sons wör dat en Beleidijung für dat Kresskindche. Alsu säht der Pappa: dann dummer evvens eine vun de Hellije drei Künnije köppe, dun de Kopp op dä Hirt setze, un jonn am zweite Weihnachtsdach noch ens em Keller sööke. Un wemmer dann dä Hirtekopp finge, tuusche mer vür Dreikünnije de Kopp widder öm. Dann han se op Dreikünnije all widder de richtije Köpp opjesetz. ävver de Mamm hätt jesaht, dat jing nu och nit, weil doch die Künnije en Krun om Kopp hätte, un ene Hirt met ener Krun om Kopp, dat wär unsozial.
Da säht dann dr Pappa, dat wär nit esu schlemm. Mer künnt jo met Schmirjelspapier die Krun von däm Künningskopp avschüüre, dann hat dä Hirt met dam Künningskopp evvens en Pläät. De Mamm hat ävver trotzdem Bedenke jehatt: un wat passet, wemmer dann en dr ääpelskess dem Hirt singe richtije Kopp widderfinge, dr Künning dann singe Kopp widderkrääsch un dä hät kein Krun?
Dat wär natürlich e Problem, hät dann dr Pappa jesaht. Dann hat ävver uns Marieche die Idee jehatt, mer künnte doch dem Künning en Krun us Lametta zesammefriemele un op dä Pläätekopp drop klääve. Jenau dat hammer och probeet. Dat wor vielleich en pingelijje Arbeit. ävver dat jing dann och nit. Nämlich jedesmol, wann de Düür vum Zemmer opjing, jing de Krun us Lametta vun da jlatte Plaat vum Durchzog fleeje, weil dä usselije Pappkleister dat Lamettazeusch op dam blanke Jipps nit heelt. Un jitz es dr Pappa alsu esu sauer, dat hä jesaht hät: et wöht nit iher bei uns Hellije Ovend jefiert, bes dat Problem mit däm Kopp jelös wör. Un esu wie isch dat nu kenn, kann dat noch e paar Johre duure, weil doch och de Mamm jesaht hätt, de Pappa hätt en paar linke Häng und hätt esu en kribbelije Arbeit noch nie jekunnt. Also waade mer halt ens av, wat noch kütt. Dir wünsch isch op jede Fall schon ens schöne Weihnachte un ene schöne Jross.

Dinne Pitter